Nebonebo ao Kakaaitau (#10424)

Nebonebo nikabane, Atuau, bon Nakoim are boni Ngkoe Rikin te Mimitong nikabanea ao te kakannato ni uea, te kakannato ao te karineaki, te inaomata n tautaeka ao te mwaaka n tautaeka, te kairirieta ao te raoiroi, te kakanako nano ao te mwaaka.  Ane Ko nano irouna ni kaania te Marawa ae Moan te Kakannato, ao ane Ko matennanoia Ko bon katokaa i aona rinena ni kinaakin Aram are Katokin Ngkoangkoa. Mai buakoia nikabane ake i karawa ao i aon te aonaaba, akea ae e konaa ni kaaitaraa waakinan Nanom n Inaomatam n Uea.  Man te aki tootoki nikabane Ko a tia n tautaekana te karikibwai ae bwanin, ao Ko na bon teimatoa n taai nako ni kabonganaa Am waaki n tautaeka i aoia nikabane baike a karikaki.  Bon akea riki Te Atua bwa ti Ngkoe, Moan te Korakora, te Kabanea n Karietataaki, te Kabanea ni Mwaaka, te Kabanea ni Wanawana.
Kaootai moaia Am toro, te Uea, bwa a aonga n Tataraiko; ao kaitiaki nanoia bwa a aonga n rairaki nakon bwerein Am bwai n aakoi ni karawa, ao ni kinaa Teuare Ngaia te Tia Kaotiotiko ao Rikin Ngainan Aro ni koaua.  Ni koaua, boni Ngkoe te Uea n aonaaba nikabane, Akea riki Te Atua bwa ti Ngkoe, te Aki Eenaki Arona, te Tautoroi bwaai nako.

-Bahá'u'lláh
-----------------------

Nebonebo ao Kakaaitau (#16138)

N Aran te Atua, te Kabanea n Rietaata! Ko kamoamoaaki ao ni kamimitongaki Ngkoe, te Uea, te Atua ae e Karietaaki! Ngkoe are i moan Wanawanam naake a wanawana a bwaka i nano ao ni kabwaka, are i moan Am atatai taan ataibwai a kaota nanorooia, are i moan Korakoram naake a korakora a iinako ni mamaara, are i moan Kaubwaim naake a kaubwai a kaota kainnanoia, are i moan Otam naake a kaotaaki a bua n te rootongitong, nakon bangotan Am atatai are e onika oioin te mataata ni katobibia Rarikim ae e tabu are e katobibiaki n tamneia aomata nako. 
Nna kanga ngkanne n anenea ao n taekina Oioim Arom, are wanawanaia taan wanawana ao reireia naake a tia n reiakinaki a tia ni kabwaka ni kabwarabwaraa, n ai aron ae akea te aomata ae e kona n anenea te bwai ae e aki mataata iai, ke n taekini bwaai ake e aki roko iai, ma Ngkoe man te aki tootoki Akea ae e kona n Roko Iroum, n Aki Kona ni Kuneaki. E ngae ngke akea korakorau ni mwemwerake nakon karawan Am mimitong ao ni kiba inanon aonnaban Am atatai, I ti kona n taekin Am kanikinaa ake a kabwarabwara mimitongin Am mwakuri.
Ni Mimitongim! O te Tia Tangiraki n naano nikabane, Ngkoe are n Ti Ngkoe Ko kona ni karauaka ingaingan nanoia Ibukim! E ngae ngkana taan maeka i karawa ao n te aonnaba a katiteuanaaki ni kamimitonga Am kanikinaa are te kabanea ni mangori, are inanona ao are mai iai Ko a tia ni Kaotako iai, ma a na bon kabwaka, ni kona riki ni kamoamoaa Am Taeka ae e Tabu, te tia karikii nikabane Am kanikinaa.
Nebonebo ao mimitong nikabane a Nakoim, Ngkoe are mai Iroum bwaai nikabane a tia ni kakoaua bwa Ngkoe bon ti temanna ao akea riki te Atua bwa ti Ngkoe, Are Ko a tia man te aki tootoki ni karietaaki iaoia nikabane ke katotongaia ao nakon te aki tootoki n tiku n aron anne. Nikabane ueea bon akea bwa Am toro ao nikabane karikibwai, aika a noraki ao aika a aki, ai aron te akea i Matam. Akea riki te Atua bwa ti Ngkoe, te Tituaraoi, te Korakora, te Kabanea n Rietaata.

-Bahá'u'lláh
-----------------------

Nebonebo ao Kakaaitau (#16139)

E na kamimitongaki Aram, O te Uea Atuau! Ngkoe are Ko taromauriaki irouia nikabane ao akea ae Ko taromauriia, Ngkoe are Uean bwaai nikabane ao akea ae Ko aantaeka irouna, are Ko atai bwaai nikabane ao akea ae e Ataiko. Ko tangiria ni kan Kaotiko nakoia aomata; ai ngaia are, Ko bon, rinanon te taeka man Wiim, ni karika te karikibwai bwa e na kaoti ao ni buaa te uniweti. Akea riki te Atua bwa ti Ngkoe, te Tia Buai bwaai, te Tia Karikibwai, te Kabanea ni Mwaaka, te Kabanea ni Korakora.
I bubutiko, man te taeka raoi aio are e a tia n otanako I etan oraitanin Am kantaninga, ni karekea angaraoiu bwa nna moi man kabin te ran ni kamaiu are rinanona Ko a tia ni kamaiui nanoia naake Ko rineia ao ni kakorakorai tamneia ake a Tangiriko, bwa nna kona, n taainako ao iaan itera nako, n raira moau n tabwanin Nakoim.
Ngkoe Atuan te korakora, te mimitong ao te tituaraoi. Akea riki te Atua Irarikim, te Kabanea n Rietaata n Tautaeka, te Kabanea ni Mimitong, te Karietaaki.

-Bahá'u'lláh
-----------------------

Nebonebo ao Kakaaitau (#16140)

Ngaia te Atua, E karietaaki Ngaia, Uean te mwaaka ao te kakannato!
O te Atua, Atuau! I anganiko te karabwarabwa n tainako ao n Anganiko te kamoamoaaki iaan itera nako. 
N te kaubwai, nikabane kamoamoa bon Am bwai, O Uean Aonnaba nako, ao n akeaia, nikabane kakaaitau bon Am bwai, O aia Tangira naake a tia ni Kinako!
N tain te kanganga, nikabane karinerine bon Am bwai, O te Tia Matennanoaki irouia nikabane ake i karawa ao iaon te aba, ao n tain te kanganga, nikabane mimitong bon Am bwai, O are iai Mwaakana iaon nanoia naake a ingainga Ibukim!
N tain te rawawata, nikabane kamoamoaki bon Am bwai, O Ngkoe aia Kouru naake a Ukoukoriko, ao n tain te mwengaraoi, nikabane karabwarabwa bon Am bwai, O Ngkoe are Uringam e nabeaki inanon nanoia naake a kaan Nakoim!
N tain te kaubwai, nikabane tikaua bon Am bwai, O Ueaia naake a babananoia Iroum, ao n tain te kainnano, nikabane kaetieti bon Am bwai, O Ngkoe aia Kantaninga naake a ataa Am katiteuana!
N tain te kukurei, nikabane mimitong bon Am bwai, O Ngkoe are Irarikim bon akea riki te Atua, ao n tain te nanokaawaki, nikabane tamaroa bon Am bwai, O Ngkoe are Irarikim bon akea riki te Atua!
N tain te baki, nikabane motiraoi bon Am bwai, O Ngkoe are Irarikim bon akea riki te Atua, ao n tain te nuai, nikabane karaoiroi bon Am bwai, O Ngkoe are Irarikim bon akea riki te Atua!
Inanon abau, nikabane tituaraoi bon Am bwai, O Ngkoe are Irarikim bon akea riki te Atua, ao n tain te taemwengaaki, nikabane kaetieti bon Am bwai, O Ngkoe are Irarikim bon akea riki te Atua!
Iaan te kabaeng, nikabane tituaraoi bon Am bwai, O Ngkoe are Irarikim bon akea riki te Atua, ao iaon te bubuntano ae e mangori, nikabane mwannano bon Am bwai, O Ngkoe are Irarikim bon akea riki te Atua!
Inanon te karabuuti, nikabane kakaonimaki bon Am bwai, O Ngkoe te Tia Anga bwaintangira, ao n tain te kainaki, nikabane aki tootoki bon Am bwai, O Ngkoe are te Uea ae e teimatoa n aki totoki!
Nikabane bwaintituaraoi bon Am bwai, O Ngkoe are Atuan te bwaintituaraoi, ao te Tia Tautaeka iaon bwaintituaraoi, ao Uean bwaintituaraoi! I kakoaua bwa Ko na riai ni kamoamoaaki n Am mwakuri nako, O Ngkoe Boton te bwaintituaraoi, ao ti na ongotaeka nakon Am kaetieti, O Ngkoe Marawan te bwaintituaraoi, Teuare are mai Iroum nikabane bwaintituaraoi a waaki mai iai, Teuare are Nakoim nikabane bwaintituaraoi a na oki Nakoim!

-Bahá'u'lláh
-----------------------

Nebonebo ao Kakaaitau (#13714)

Boni Ngaia te Atua! O te Uea, ti na kanga ni kaitauko?
Akea tian Am bwai n akoi, ma ara karabwarabwa, iai tiana.
E na kanga are iai tiana ni karabwaa are akea tiana?
Ti bon aki kona n anga te kaitau ibukin Am Nanoanga.
Ngkai akea korakorara, ti a rairaki nakon Abanueam ma ni bubuti bwa Ko na kabatia Am Angaanga ma Am bwai n akoi.
Bon Ngkoe te Tia Angaanga, te Tia Bwabwaintangira, Bon Ngkoe te Korakora.

-`Abdu'l-Bahá
-----------------------

